Ambasadorja Vlahutin i dorëzon Presidentit strategjinë e KE-së

 

Presidenti Ilir Meta, priti në një takim Ambasadoren e Delegacionit të BE-së në Tiranë, Romana Vlahutin.

Ambasadorja Vlahutin i dorëzoi Presidentit Strategjinë e re të Komisionit Europian, “Një perspektivë e besueshme zgjerimi dhe një angazhim i thelluar i BE-së në Ballkanin Perëndimor”, si dhe Planin e Veprimit në mbështetje të transformimit të Ballkanit Perëndimor.

Presidenti vlerësoi synimin për të pasur një angazhim gjithnjë e më të madh, si nga vendet e rajonit ashtu edhe nga Bashkimi Europian, në proceset transformuese drejt anëtarësimit të plotë të të gjitha vendeve të Ballkanit Perëndimor në Bashkimin Europian.

Presidenti Meta nënvizoi se Strategjia e re e Komisionit Europian është një dokument që duhet të lexohet me vëmendje nga faktorët politikë shqiptarë për t’u pasqyruar në përpjekjet dhe angazhimet e tyre drejt synimit të përbashkët të integrimit të plotë të Shqipërisë në Bashkimin Europian.